Mark 8

Yesu nose'na li huto huto 4000 boana'magihi epi'ehina

Mt 15:32-39

1To yalo ana kanagu, silaga bona'magi Yesutoga li gehesa babu lite nehago, to nose'na'ani meni'igo Yesu ya'ma kehelito pana'alobo kehe igo ago ma lu epi'ehina: 2Ke. Nani ya'ma boana'magihi keke'i nolu epolobe. Enali nanitoga loe yagi mone yagi yegegu mine'ahana to nose'na'ani meni'ibe. 3To nani enele'mo he'minogo, kau'na enehenogo kapogu fililana'mu yabe. To mone'amagi foto hepatogati e'ahabe. Ya'mu nani keke'i nolu epolobe. 4Ya luto ligo pana'alobomagi ma lu emi'ahana: Lali ya'ma yu hepatoga nohutaya hiya'a huto nose'na lito asaga bona'i epilune? 5To ya lago ai ma luto enoloka habe: Beleti nose'na lenalitoga henaki ni'ibe? To enali: 7 yabe, lu emi'ahabe.

6Ya lago, ai asaga boanatoga: Meto minalo luto ka lu noepito'a, yalo ana beleti nose'na 7 liloto, Hu'mamofitoga fokehi liloto'a yaha'atu beleti li gofa huloto pana'alobomagihi epigo, enali lite bite yege yege bona'magihi gabu ite epigo ne'ahana yabe. 7To ana huto lagaso faya'i loe'asi ni'igo, Yesu lito Hu'mamofitoga fokehi lito pana'alobomagihi: Lite bite epilo, luto lu epigo enali lite bite epi'ahabe. 8To asaga'i nenete enumu higo he'mi'ahago, Yesuhi pana'alobomagi nose'na fakene hu'ehina letuha'a lite he gigite, sipi sepeke'na 7 bai toto li'ahabe. 9To ana nose'na ne'ahana bona'i babu lite, 4000 boana'magi yabe. 10Ne su helago, Yesu enele'mo he'migo hepa'aniloga bi'ahana yabe. To bi su helago, Yesu pana'alobo hiti ana'asi boti mone'agu tilete Talamanuya kapogu bifa hi'ahana yabe.

Topa hose foya bu galune lite Felosi bona'magi li'ahana

Mt 16:1-4

11Anaga bite neminago, Felosi bona'magi kehelilete'ani ete Yesuhi hiti kenasabo bilune'mu ete to ai kumu mi'i melete fi taga hi etalune'mu nehite Yesuhi nohinalo nehetite loka he'ahabe: Kokulumaguti sipi lili'na topa hose'i fato fato'i liletogo lali Hu'mau kele'mo ho ti'ehina bo nohapi menohapi bu galune. 12Ya lite lago, Yesu komopa'agu, abo, luloto, yalo ma luto lu epi'ehina: Lenali yatai bona'i yale. Henabe lite nani fi taga hi netete, kokulumagati sipi lili'na topa hose fato fato'i liletogo bu galune lite nelabe? Ma'naka lu nolepube. Nani lenali yatai bona'magita sipi lili'na topa hose fato fato'i meli lepalalube'mu nohube. 13Yesu ya luloto, enalitogati he'mito buto pana'alobo'amagi hiti botigu tite nagami muya beletoga aku'i bilune'mu nehabe.

Felosi bona'magihi hapa'animofihi kaba hu bati hilo

Mt 16:5-12

14To botigu bilune'mu nehite ya'ma pana'alobomagi enegekesu hago nose'na asaga'i melise beleti nose'na moneko'isi anasi lite nebago, 15Yesu fato kaga kehelito lipoti epito ma lu'ehina: Lenali kaba hu bati hite minalo. Ya'ma Felosi bona'magihi hapa'ani to Heloti naga'i nehana bona'magihi hapa'ani mege'i memelese minete kaba hilo. Enali hapa'ani ya'ma yisiti beleti kelo kelo tilina'a legitana ni'ibe. Foipa hapa'ani ni'igo asaga bona'magihi hapa'ani le'mo sibina hulatanamo ni'ibe. 16Ya ligo, enali kehelite: Abo. Lali beleti nose'na lito meo'ohutamolo ya linago lite ai lu emigo ai lu emigo hite nehago Yesu kehelito ma lu epi'ehina: 17Lenali henabe lite beleti nose'na meni'ibe lite kaga nelabe? Nani yamofi kumu menolube. Ka'nimofihi hapa'a menekehelifiye? Lenegekesa hokolo mehu'ehina ni'ifiye? To lenubutini ni'igo, bu megalune'mu nehafiye? To lenegekesa ni'igo, mekehelilune'mu nehafiye? Nani ologosi hu'ohunanamofihi beto menehafiye? 19Nani ologo beleti nose'na 5 li gofa huto'ni 5000 bona'magi epi'ohuna yupahi letuha'a henaki sulu sulu'ya li'ahabe? Ya ligo, enali: 12 sulu sulu'ya yabe lite lu emi'ahana. 20To ai ma lu epi'ehina: To ma'asi, beleti nose'na 7 li gofa huto 4000 bona'magi epi'ohuna yupahi letuha'aya henaki sepeke'na li'ahabe? Ya ligo, enali: 7 sepeke'na yabe lite lu emi'ahana. 21Ya lago, ai: Ana henabe lite menekehelibe? Nani beleti nose'namo'mu nekesa keheli keheli hiluna'a meni'ibe. Yesu ya luto lu epi'ehina yabe.

Bu pisi lu'ehina bomofihi Yesu le'mo bati hu'ehina

22To yalo Yesu to pana'alobomagi hiti Betesaita hepatoga nehetite neminago, bona'magi bo mone bu pisi lu'ehina bomo Yesutoga le'mete bite: Oho. Kayapotu bako huletogobe lite buka tilago, 23ai bu pisi lu'ehina bomofihi yapo lito, le'moto buto nohi hepatogati he'mito buto le'mo fegutoga moloto libi'na bu'alo ho folo etoto to yatu bu'alo bako hu etoto'a: Henana bu nogane luto loka hago, 24ai gili huto bu go saga huloto ma lu'ehibe: Nani yatai bona'magihi yafa legi hite kapo nemalago bu nogobe. 25Ya ligo, Yesu mone hiti yatu bu'alo bako higo, ai gili gili huto nohuto'a bu'a i gili huto bu go bati hu'ehina yabe. 26To Yesu: Ya'ma nohi hepatoga metise nohutoka hepatoga fa'mene bufa hubo, luto ho lifi'ehina yabe.

Yesuhi Hu'mau koho lifi'ehina bo nohane Pitau lu emi'ehina

Mt 16:13-20; Lk 9:18-21

27To yalo, Yesu pana'alobo hiti'i Sisalia Filipai kapogu ni'ina hepa'mo bego bego hilune'mu nebago Yesu pana'alobo ma luto enoloka ho'ehina: Asaga bona'magi nani kumu hena ka nelabe? 28Ya ligo, enali ma li'ahana: Mone'amagi Yoniu nagami folose bo yabe lite nelabe. To mone'amagi Elaiya yabe lite nelabe. To mone'amagi koyapa ka lu huto huto bo moneuba aku'i ho notibe lite nelabe. Kai kumu ya lite nelana yabe. 29Ya lago, ai: To lenaliya? Lenali nani kumu kaga henana lite nekehelibe? Ya'ma ya luto enoloka nohago, Pitau ma luto lu emibe: Kai Hu'mau kele'mo ho ti'ehina bo, Mesia nohane. 30Ya ligo, Yesu amuya kaga lu epito ma lu epi'ehina: Lenali ana kaga nani kumu bona'magihi lu meepilo. Ya luto lu epi'ehina yabe.

Keke'i luse'nauba nugupisalo tigo fililuna'mu yabe Yesu lu'ehina

Mt 16:21-28; Lk 9:22-27

31To yalo, kaga lu noepito ma lu'ehibe: Nani Kokulumaguti limi'ohuna Bomofita alihi kalana'i mele netete to baga'a hiti'na nugupisalo tinogo kofilube. To enali olopa mono bona'magi hiti sipi mono'i kaba bomagi hiti to mono ka negana bona'magi hiti enemegesa hi nimilete nahalabe. To malipu yafalo noho fililenogo'ni loeyagi moneyagi yegegu keligu minoloto'ni yalo fili'ohunaguti gololo tuto ho tito minalube. 32Yesu ya'ma huto hilina hapa'a lu hokolo hu epi'ehina yabe. To ya lulago Pitau Yesuhi suguna'i nesi'asi le'moto buto bugu ka ma luto lu emi'ehina: Ya'ma ka lege nobo. Henabe luto koho fililabe? 33To ya noligo, Yesu i behe huto pana'alobo asaga'i bu enogoto ma luto Pitahi ka emeki'ehina: Satao, nemegesalo minobo. Kai Hu'mamofitoga keheli emito menominane. Kai melugu bona'magihi kehelise'na'ani lito nominane.

34Yalo Yesu pana'alobo hiti asaga bona'magi hiti kehe igo ago ma lu epi'ehina: Nemege'i malalube'mu nohina bouba ma huto minalibe. Ai hapa'amu'i: Nemetahana meni'ibe luto he'miloto malipu li kofiloto'a nemege'i bati huto malalina'mu yabe. 35To bo moneuba meha'a li pili koto minalina bomofi ai meha'a fenene hilibe. To bo moneuba nani kumu luto to ka lamana'a kumu luto meha'a nimilina bomofi, ai meha'a minoba minoba hilina'mu yabe. 36To bouba hena mina'a he'mito meha'a aku'i lilina ni'ibe? Mone meni'ibe. Yogo fe'nohi asaga'i ya'ma melugu ni'inana li baga ilenogo, to meha'a fenene higo bati huto minalifihe? O'e. Ya huto meni'ibe. 38To bo moneubafi ya'ma ka mekehelise foipa nehana kanagu nani kumu to ka'nimu megesa hu nimilenogo, nani Kokulumaguti limi'ohuna Bomofita, alihi ana huto nemegesa hu emito minalube. Nani alihi afo'nifu nele'mo bati hulenogo to fana meha'ni besa lago nohuto'ni to hetofa agelomagi hiti aluna kanagu nani ana bo'mu nemegesa hu emito minalube. Yesu ya luto lu epi'ehina yabe.